Þar sem sjón grundvallast af endurkasti birtu úr umhverfinu okkar, hefur birtumagn áhrif á sjóngæði. 

Fyrir áhugasama dýpkum við þetta aðeins:  

Í augnbotninum er svæði með ljósnæmum frumum, sem umbreyta ljósorkunni sem augað nemur,  í nokkurskonar tauga/raforku púlsa,  sem aftur sjóntaugin leiðir til sjónstöðva heilans. Það er svo í heilanum sem hin sjónræna upplifun á sér stað. Til að hámarka skerpugetu hvers auga þurfa því ljósgeislarnir að lenda sem næst allir í einum punkti, fókuspunkti á augnbotninum.  

Þetta er töfrum líkast 

Ýmislegt getur haft áhrif á sjóngetu í sjónmælingunni, en oftast eru bæði gerðar objektívar  

(hlutlægar ) mælingar með tölvu sem mælir stærð og lögun augans og svo subjektívar (huglægar) mælingar þar sem viðkomandi sem er mældur, tjáir sig um það sem hann sér og glerjum er skipt fyrir framan augun. 

Markmiðið er þá að hámarka sjónskerpu hverju sinni.  Forðast ber að píra augun á meðan eða reyna of mikið á sig við að fókusera, þar sem það getur leitt til verri niðurstöðu. Passað er uppá þetta í mælingum og oft notaðir augndropar til að koma í veg fyrir þessháttar áhrif.   

Sveiflur í sjónskerpu á meðan á mælingu stendur geta verið margvíslegar og  oft af völdum breytinga á gæðum tárafilmunnar, vökvans framan á auganu sem við dreifum þegar við blikkum augnlokum.  

Augnþurrkur er mjög algengur á Íslandi sem ekki allir gera sér grein fyrir.   

Svörun þess sem er mældur getur því stundum verið háð þeim gæðum. Tærleiki ólíkra hluta augans eins og hornhimnu, augasteins og glerhlaups geta svo líka haft áhrif á almenn sjóngæði. Augnbotninn þarf einnig að vera heill eigi að nást góð sjónskerpa.  Skemmdir á þessum hlutum augans geta svo leitt til lakari sjónskerpu sem ekki lagast með gleraugum. 

Sjónlagsgalla er skipt í nærsýni, fjarsýni og sjónskekkju. Til viðbótar þróast með okkur aldurstengd fjarsýni á árunum eftir fertugt.  Hægt er oftast að laga slíka galla með gleraugum, snertilinsum, laseraðgerðum, ígræddum linsum eða augasteinaskiptum.  

Tölurnar sem standa í gleraugnavottorði,  lýsa því sjónlagsgallanum eins og hann er mældur og því  hvaða glerjastyrk, sem er mældur í dioptrium,  þurfi til að leiðrétta hann.  Með dioptrium er átt við fókuslengd glersins mælt í metrum.  

Lögun augans og eiginleikar þess geta svo breyst á venjulegu æviskeiði,  þó svo allur gangur sé á því hvernig ólíkir einstaklingar upplifi þær breytingar.  Almennt er sjón fólks góð ef engir augnsjúkdómar herja á það, sjónlagsgallar geta svo haft áhrif á hvort við nýtum skerpu augnanna að fullu eða ekki.